د کراچۍ په یوه احتمالي هدفي برید کې یو دیني عالم وژل شوی دی

د مولانا عبدالقیوم صوفي په نوم دغه دیني عالم هغه مهال د نامعلومو موټرسایکل سپرو له خوا په ډزو ووژل شو چې د سهار له لمانځه وروسته په ګلستان جوهر اړوند نهم بلاک کې کور ته روان و.

مولانا عبدالقیوم صوفی د پاکستان د علماوو د ټولنې او د جامع مسجد محمدیه نوراني اسلامي مرکز غړی و.

له رسنیو سره په خبرو کې د سني علماوو شورا مشر علامه اشرف ګرماني ویلي، چې مفتي عبدالقیوم د عایشه جومات د شخړې څارنه کوله.

هغه زياته کړه چې د مفتي منيب الرحمان سره مشوره روانه ده او د پوليس شکايت درج کولو لپاره به د کميټۍ غونډه کوي.

د ګلستان جوهر پولیسو رسنیو ته ویلي چې د پېښې څخه خبر دي او وسلوالو پسې یې لټون پیل کړیدی.