واشنګټن—د امريکا او ايران ترمنځ د اټومي پروګرام په تړاو د روانو مذاکراتو له جریانه خبر سرچينو راپور ورکړی چې واشنګټن تهران ته وړانديز کړی، ترڅو د متحده عربي اماراتو په څېر اټومي پرګرام ماډل ومني.
د دغه ماډل له مخې، ايران کولای شي ملکي اټومي ريکټورونه ولري، خو يورانيم به له بهر څخه واردوي او د کور دننه به د غنيسازۍ اجازه نه لري. سربېره پر دې، د دغه پروګرام ټول فعاليتونه به د نړيوالې ټولنې تر څار لاندې وي.
امريکايي چارواکي وايي چې متحده عربي اماراتو ياد ماډل څو کاله وړاندې منلی او په برياليتوب سره يې عملي کړی دی. خو ايران تر دې دمه د ورته چوکاټ منلو ته غاړه نده ایښي.
امریکایي او اسرایلي چارواکي باور لري چې د یاد اټومي پرګرام سره د ايران د مخالفت اصلي لامل دا دی چې د دوی واقعي موخه د انرژۍ توليد نه، بلکې د يورانيمو غنيسازي ده—يو بهير چې د اټومي وسلو جوړولو ته زمينه برابرولای شي.
نړيواله ټولنه د ايران د اټومي پروګرام په تړاو د شفافيت نه شتون له امله ژوره اندېښنه لري، او باور لري چې که ايران د يادې طرحې منلو ته غاړه کېنږدي، دا چاره به د سيمې ثبات ته جدي ګواښ پېښ کړي.
