فیبروري-۲۲-۲۰۲۵
واشینګټن :- د امریکا څخه خبرونه وايي چې د امریکا او هند ترمنځ د دفاعي همکاریو د پراخېدو په لړ کې، د امریکا ولسمشر ډونالډ ټرمپ ادارې هند ته د F-35 جنګي الوتکو د پلورلو وړاندیز منظوري ورکړي. F-35 جنګي الوتکې چې د امریکا تر ټولو پرمختللې پوځي الوتکې ګڼل کېږي. هند به یې رانیولو سره د نړۍ هغو 20 شلو پرمختللو پوځي ملکونو کتار کې راشي چې دا پرمختللي الوتکې لري.
بلخوا، د هند سیال هېواد پاکستان د دې پرېکړې په اړه سخت غبرګون ښودلی. د پاکستان د بهرنیو چارودفتر ویاند، شفقات علي خان، خبرداری ورکړی چې دا ډول پوځي مرستې به په سیمه کې د ځواک توازن ګډوډ او د ستراتیژیک ثبات لپاره خطر پېښ کړي.
نوموړي له نړیوالو غوښتنه کړې چې د جنوبي اسیا د سولې او امنیت په اړه بېطرفه دریځ غوره کړي او له داسې یو اړخیز سیاست څخه ډډه وکړي چې له ځمکنیو واقعیتونو سره سمون نه لري.
د یادولو ده چې که څه هم د پاکستان حکومت د امریکا نوي ادارې سره د هند په رقابت کې د تعامل هڅه کې دی خو د هند سره د ټرمپ ادارې پراخو اړیکو له امله پاکستان تر اوسه پدې نه دی توانیدلی چې د ټرمپ ادارې چارواکو سره وویني او د خپل رقیب سره د امریکا په دوستی کې سیالي وکړي.
