کییف– د اوکراین ولسمشر ولادیمیر زیلینسکي اعلان کړی چې هېواد یې تمه لري په ۲۰۲۵ میلادي کال کې له متحده ایالاتو څخه ۳۰ میلیارده ډالره مرسته ترلاسه کړي. دا مرسته به د امریکا له خوا د اوکراین د بیا رغونې د پانګونې صندوق ته ورکړل شي.
ولسمشر زیلینسکي زیاته کړې چې دا مالي مرسته د امریکا د پخواني ولسمشر جو بایډن د ادارې پر مهال د ۲۰۲۵ او ۲۰۲۶ کلونو لپاره تصویب شوې وه،خو اوس يې د عملي کېدو لپاره وروستي ګامونه اخیستل کېږي.
د اوکراین د دولت په وینا دا مرسته به د جګړې له امله زیانمنو شوو زیربناوو، اقتصادي ودې، انرژۍ، کرنې، او بنسټیزو خدماتو د رغولو لپاره وکارول شي.دا مرسته به د هغو هوکړو برخه وي چې د اوکراین د طبیعي زیرمو، په تېره بیا د معدني سرچینو، په اړه له امریکایي لوري سره شوی ده.
د ولسمشر زیلینسکي په باور دا مرسته نه یوازې اقتصادي ملاتړ دی، بلکې د امریکا او اوکراین ترمنځ د ستراتیژیکو اړیکو یو پیاوړی ثبوت هم دی. نوموړي وویل: “دا یوازې مالي مرسته نه ده، بلکې د یو آزاد او خپلواک اوکراین د راتلونکي لپاره یو مهم ګام دی.”
د اوکراین چارواکي هیله لري چې دغه مرسته به د هېواد د ثبات، اقتصادي پیاوړتیا، او نړیوالو پانګوالو د باور زیاتېدو ته لاره هواره کړي.
