د سویلي کوریا پارلمان د ولسمشر یون سئوک یول له خوا د اعلان شوي اضطراري حالت د لغوه کولو په پلوۍ رایه ورکړه.
دا پرېکړه د ډیموکراسۍ د ساتنې لپاره د پارلمان لخوا د چټک اقدام په توګه وستایل شوه. د ملي شورا رئیس وو وون شیک د اضطراري حالت فرمان “بې اعتباره” وباله او د امنیتي ځواکونو د پارلمان له ودانۍ څخه د ویستلو امر وکړ.
ولسمشر یون سئوک یول د ډسمبر په ۳مه په ناڅاپي ډول اضطراري حالت اعلان کړ، دا یې د دولتي ضد عناصرو پر وړاندې د اقداماتو یوه برخه وبلله. دغه پرېکړه د اپوزیسیون لخوا له سخت غبرګون سره مخ شوه، چې د پارلمان ډیرۍ څوکۍ په واک کې لري.
د پارلمان غړو د ملي شورا په تالار کې د پاتې کېدو پرېکړه وکړه ترڅو ډاډ ترلاسه کړي چې ولسمشر خپل فرمان په رسمي ډول بیرته اخلي. د اپوزیسیون مشر لی جې میونګ ټینګار وکړ چې دا ډول اقدامات د ولسواکۍ لپاره جدي ګواښونه دي
د پارلمان پرېکړې سره، امنیتي ځواکونه بېرته ستانه شول، او په هېواد کې عادي حالت ته د بېرته ګرځېدو هڅې روانې دي. دا پېښه د سویلي کوریا د سیاسي تاریخ یوه مهمه شېبه ګڼل کېږي، چې د ولسواکۍ او قانون د واکمنۍ اهمیت څرګندوي.
تازه راپورونو په اساس د سویلي کوریا ولسمشر هم اعلان وکړ چې په راتلونکې حکومتي غونډه کې به په هېواد کې اضطراري حالت لغوه کړي.دا پرېکړه وروسته له هغه شوې چې د پارلمان لخوا د اضطراري حالت د لغوه کولو لپاره ورباندې فشار زیات شو.
