ونکور—د کاناډا څخه خبرونه وایي چې نن د ونکور ښار په سویلي برخه کې د فلیپیني ټولنې د «لاپو لاپو» د ورځې فستیوال پر مهال، یوه تن په قصدي ډول خپل موټر د خلکو په ګڼه ګوڼه وروستلو، چې له امله یې لږ تر لږه ۹ تنه وژل شوي او ګڼ نور ټپیان دي.
پېښه هغه مهال رامنځته شوه چې د فستیوال رسمي مراسم پای ته رسېدلي وو، خو لا هم ګڼ شمېر ګډونوال، هنرمندان او د خوراکي توکو پلورونکي په سیمه کې موجود وو.
د کاناډا ونکور پولیسو یو ۳۰ کلن سړی، چې د ونکور اوسېدونکی دی، د پېښې په ځای کې نیولی دی. د پولیسو په وینا، شکمن کس له دوی سره پخوا هم په ځانګړو مواردو کې پېژندل شوی و، خو دا پېښه د ترهګرۍ عمل نه ګڼل کېږي. د ونکور د پولیسو د لویو جرمونو څانګې د پېښې پلټنه پیل کړیده.
د کاناډا سرپرست صدراعظم مارک کارني، د ونکور ښاروال کن سیم، د برېتیش کولمبیا والي ډېوېډ ایبي، او د محافظهکار ګوند مشر پییر پولیېور د پېښې قربانیانو ته خواخوږي څرګنده کړي او د فلیپیني ټولنې سره یې همدردي ښودلې ده.
«لاپو لاپو» ورځ د فلیپین د ملي اتل داتو لاپو لاپو د ویاړ لپاره لمانځل کېږي، چې د هسپانوي استعمار پر وړاندې یې مبارزه کړې وه. دا فستیوال د فلیپیني کلتور نندارې، هنري اجرااتو او خوراکي توکو سره یو مهم فرهنګي مراسم ګڼل کېږي.
