نوی ډهلي / اسلام آباد — د هند پوځ خپل تازه بیان کې ویلي چې د سې شنبې په ورځ یې د پاهلګام برید په غچ کې د پاکستان او پاکستان تر کنټرول لاندې کشمير کې د تروریستانو نهه (۹) مرکزونه په همغږي شوي هوایي بریدونو کې په نښه کړیدي.
د هند دفاعي چارواکو ویلي چې د سندور عملیاتو په ترڅ کې یې د پاکستان ملاتړو تروریستي ډلو پر هغو روزنیزو کمپونو او لوجستیکي مرکزونو بریدونه ترسره کړي چې د پاهلګام پېښه کې ترې کار اخیستل شوی وه . د یادو چارواکو په وینا چې د ذکر شوي بریدونه په ترڅ کې یې د مظفراباد ، بهاولپور ، پنجاب او کوتلي سیمو کې د جیش محمد او لشکر طیبه ډلو مرکزونه له منځه وړیدي.
د یادو بریدونو وروسته د هند یو لوړ پوړي چارواکي نوي ډهلي کې یوې خبري غونډې ته وویل: “دا یو متمرکز او متناسب تروریستي ضد عملیات وو. موږ یوازې د غیر دولتي لوبغاړو پر ضد عمل وکړ او د پاکستان نظامي شتمنۍ مو نه دي هدف کړي.”
د هندوستان دفاعي سرچینو رسنیو ته ویلي چې د پاکستان دننه د تروریستانو مرکزونه یې له هند خاورې څخه د اوږده واټن ویشتلو بالستیک توغندیو باندې په نښه کړیدي.
پاکستان حکومت دغه بریدونه غندلي او دا یې “بې ځایه جګړې ته ورته عمل” بللی دی. او زیاته کړیده چې په دې بریدونو کې لږ تر لږه ۸ ملکیانو، په شمول یو ماشوم، وژل شوي او ۳۵ نور ټپیان دي. د پاکستان تر کنټرول لاندې کشمير سیمې کې ځینو زیانمنو شویو تاسیساتو کې مذهبي ځایونه او یوه کلینیک هم شامل دي.
بلخوا ته د پاکستان پوځ ادعا کړي چې ځوابیه بریدونو کې یې پنځه هندي جنکي الوتکې هم ویشتلي، خو دغه ادعا تر اوسه نه خپلواکو سرچینو او نه هند تائید کړیده.
د یادو بریدونو وروسته نړیوالو غبرګونونو په ترڅ کې ملګرو ملتونو ، امریکا، بریتانیا او چین په دواړو هېوادونو باندې د زغم څخه کار اخیستلو غږ کړی. او د امریکا جمهور رئیس ډانلډ ترمپ هم خپل تازه بیان کې ویلي چې له یادې جګړې خبر دی او هیله لري چې اوږده نشي.
