د وروستیو راپورونو له مخې د اوکراین حکومت د هنګري د لومړي وزیر ویکتور اوربان د هغه وړاندیز سره موافقه نه ده کړې چې له روسیې سره د اوربند خبرې وکړي.
اوربان د کیف په سفر کې له ولسمشر زلنسکي سره ولیدل او د”اوربند لپاره لومړني ګامونه” یې وړاندیز کړل خو د اوکراین چارواکو دغه نظر رد کړ.
د اوکرایني چارواکو د نظر له مخې د روسیې لخوا یو اړخیز اوربند یوازې مسکو ته وخت ورکوي چې خپلې پوځې سرچینې بیا منظمې او د جګړې لپاره چمتوالی ونیسي.
د اوکراین ولسمشر زلنسکي په ځواب کې د “سولې دوهم کنفرانس” د ترسره کېدو وړاندیز وکړ، چې په کې به یوازې هغه وخت د روسیې ګډون ته ځای ورکړل شي کله چې مسکو د جګړې پر وړاندې خپلې غوښتنې پریږدي او له اولتیماتومونو څخه ډډه وکړي.
د دې ترڅنګ اوربان ژمنه وکړه چې د هنګري او اوکراین ترمنځ د ښو اړیکو لپاره به کار وکړي او په هنګري کې د یوې اوکرایني ښوونځۍ د جوړولو ملاتړ یې اعلان کړ. دا په داسې حال کې ده چې هنګري په اروپایي ټولنه کې د روسیې د یو شمېر اقداماتو ملاتړ کړی دی، چې د نورو غربي هېوادونو مخالفتونه یې پارولي دي.
