د اسرایلو د دفاع وزارت نن خبر ورکړی چې د یمن له خاورې د حوثي یاغیانو لخوا پر اسرایلو یو بالستیک توغندی توغول شوی خو د اسرایلو هوايي دفاعي سیستم لخوا مرکزي اسرایلو فضا ته رسیدو سره هوا کې وشتل شوی.
د یاد توغندیز برید په تړاو اسرایلو رسنیو لخوا خپره شوې یوه ویډیو ښيي چې یاد توغندی په هوا کې هدف ګرځېدلی، خو د توغندي یوه ټوټه ځمکې ته په لوېدو سره چاودنه او لمبې کوي. د اسرایلو امنیتي چارواکو تر اوسه د دې پېښې له امله د کوم مالي یا ځاني زیان په اړه معلومات نه دي ورکړي.
د یادولو ده چې دې وروستیو کې د حوثي یاغیانو او اسرایلو ترمنځ پوځي نښتې زیاتې شوې دي، چې دغه وضعیت په سیمه کې د جنګي کړکېچ پراخېدو اندېښنې زیاتې کړیدي.
